El misantropo

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
[p. 21 modifica]
EL MISANTROPO


     Su l’orlo d'un fosson da cimitero,
Fra i omeri e le tibie sparpagnae,
Co la gran felpa e 'l tabaron per tera,
Vedo quel fosco prencipin danese
Che se magna una crepa co le ociae,
Scovrir volendo qualche gran mistero:
Ma, struca struca, no 'l conclude un zero.
     Sta classica figura tanto bela
Me fa pensar a ti, caro Filipo,
A quei tempi beati
Che ti geri un moscon, un mataran,
Sempre col Berni e co l’Ariosto in man;
A quei dì che se andava in società
Col gilè bianco e 'l zazzarin scotà,
Se faceva la polca e la monfrina
Zapandoghe sul piè a la balarina,
E se passava alegramente l'ore
A dir sempiezzi e a mincionar le siore.

[p. 22 modifica]

Ma dal zorno fatal che ti à fissà
De scrutignar quei veci zanfruloni
Che andava predicando el so vangelo
A le colone de l’antichità,
Te vedo co la fazza stralunada,1
Con un brazzo de barba sgrendenada,
E curvo, curvo, co la man sul peto,
Andar baucando2 per le vie del gheto.
     T'ò visto qualche volta al mio cafè,
Sempre solo, nicià nel to canton,
Che no te smove un colpo de canon;
Opur, nel to pastran imbovolà,
Tuto quanto ingrugnio, tuto ingrintà,
Più duro, più salvadego d'un orso,
Novo Timon zirandolar3 sul Corso.
Te vedo spesso incocalio sul molo
Star ore e ore a far la corte al polo,
Specular su la piova e la tempesta
Col fronte scuro e senza cana in testa;
Se un amigo te vol avicinar,
Ti lo vardi per tresso e storzi el muso,
Come volendo dir:
„Fate via, desgrazia, se no te sbuso!“
     Ma se ne l’indoman te core 'l vovo4
De sentir quelo che ghe xe de novo,

[p. 23 modifica]

E ti te moli e sbampoli qua e là,
Picante Orazio col capel sbandà,
Co una filza d’anedoti salai
Da far schiatar chi no à ridesto mai;
E se, calzando un’aria da profeta,
De la to pinza5 ti ne dà una feta,
Lassete dir che la xe sempre poca
Per la stagion che no ti verzi boca.
Vustu guarir, fio mio, de sta passion?
Manda a Patrasso Eraclito e Zenon,
Co tuti quei filosofi e sienziati
Che a i zorni nostri passaria per mati;
Seguita invece nei so alegri voli
Porta, Zorutt, Goldoni, Guadagnoli,
E lassa pur che 'l vaga a tombolon
Sto mondazzo de carta da balon.



Note
  1. Incollerita.
  2. Senza saper dove nè perchè.
  3. Gironzare. Timone d’Atene, il misantropo.
  4. Ti viene il capriccio.
  5. Focaccia.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_misantropo&oldid=71048"