El diféto xe nel mánego
|
Edission original: |
Molena Spinacarpio, Bordizàndo, rime veneziane, Venezia, 1903 |
|
Fonte: |
Indice:Spinacarpio Moléna, Bordizàndo, rime veneziane, Venezia, 1903.pdf |
| ← La Volpe e l'Ua | Edission e fonte ▼ | Da l'ombra al sol → |
Ti gà studià le letare,
ti sà de geometría,
ti buti fora oracoli
de storia e geografia,
e lingue, e balo, e musica
gà in ti, pò, completà
l'educazión finissima
che andár te fà impongà.
De richi, grandi e nobili
ti marci in compagnia,
dai siti non finissimi
co' orór ti scampi via;
ma, nei ritrovi in cícara,
sempre ti xe a puntín
de la gran moda l'ultimo
perféto figurín.
Ti dà ne l'ocio al publico,
e, come che suçéde,
gh'è qualchedún che, in ultima,
magári anca te crede...
ma el mal ireparabile
el xe che un mío lontán,
caro el mio caro Bortolo,
ti spussi da paesán.