El comarègo de i molini

by Berto Barbarani

3 El comarègo dei molini I due canzonieri I due canzonieri/Libro III - Le montebaldine L'Ave Maria Val de Poro Berto Barbarani 1900 XIX Poesie veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro III - Le montebaldine

El comarègo dei molini

1900

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  L'Ave Maria

Edission e fonte ▼

Val de Poro  →

EL COMARÈGO¹ DE I MOLINI.

I.

     I molini che i se senta²
sora l'Adese, se cuna³
soto i oci de la luna,
che le rude⁴ ghe inargenta.

     E le rude, le va intorno
drento l'acqua che lavora;
'na campana à batù l'ora,
propio l'ultima del giorno.

     Su la riva, i molinari
i fa el ciasso a l'ostaria
e l'è tuta un'alegria
de vestiti ciari, ciari.

     La polenta ne le case
su le tavole la fuma;
sora i prà se fa la bruma,⁵

II.

     Bate le oto, le nove, le diese,
e i morosi se sconde par le sese...⁶
Bate le óndese
e i putini da late i vol ciuciar...
Bate le dódese...
E la luna la scapa al so paese,
e i molini scominçia a ciacolar!

III.

          MOLIN CHE LAVORA:
– Mi lo màseno el formento,
el formento casalin,
ma el paron no l'è contento...

          MOLIN CHE SE STIMA:
     ― Mi lo màseno più fin!

          MOLIN DE LA CARITÀ:
     ― Quà vien tanti poareti
ogni sabato, al molin;
quà vien s-ciapi de oseleti
a becarse el so granin;
e nissun li para via
e se màsena a vapor!

          MOLIN CHE LAVORA:
― L'è un molin che se trà via,⁷
l'è un molin che g'à del cor!

          MOLIN SPIA:
– El paron l'è una canaia
e nissun ghe dise su;
la farina, lu, el la taia
e de un saco el de fa du...

     Ma el Signor che vede tuto
g'à mandado sto dolor:
so moier che l'è de struto,
la se desfa col dotor,

     che el la visita el la guerna
se par sorte la sta mal...
E mi porto la lanterna,
e mi fasso da fanal!

          MOLIN DE LA CARITÀ:
     ― E pensar che l'è de ciesa
sta sposina inamorà...

          MOLIN VECIO:
     ― La sarà una malintesa
tuto quel che t'è contà...

          MOLIN DE LA MALINCONIA:
                                        (distante).
     – G'hò una roba che me pesa,
su la rua che s'ha fermà!

          MOLIN VECIO:
     ― Basta ciacole, che sento,
come udor da cristianin...

          MOLIN CHE LAVORA:
     – Mi lo màseno el formento...

          MOLIN CHE SE STIMA:
     ― Mi lo màseno più fin.

          MOLIN DE LA MALINCONIA:
     ― G'ho una roba ciapà drento
ne le pale del molin!

IV.

     I molini, che se senta
soto i oci de le stele,
voria dirsene de bele
de farina e de polenta;

     e ne l'aria, par che tasa
tuto quanto, e, a poco a poco,
gh'è le stele che dà el scroco⁸
par serarse drento in casa...

     Vien più scuro – G'à paura,
anca i ladri a andar par strada!
C'è stà a dar 'na spenelada,
così scura, così scura?

V.

          MOLIN DE LA MALINCONIA:
                                             (forte).
― Fioi, g'ò un morto impegnà soto la rua!

---

Note

1. comarègo: cicaleccio
2. che i se senta: che siedono
3. i se cuna: si dondolano
4. rude: ruote
5. bruma: brina.
6. sese: siepi.
7. che se trà via: che si adopera con abnegazione.
8. che dà el scroco: che tirano il catenaccio.