El Timo e l'Edera
|
Edission original: |
Francesco Gritti, Poesie di Francesco Gritti in dialetto veneziano, Terza edizione ricorretta e accresciuta, Venezia, G. Missaglia, 1824 |
|
Fonte: |
Indice:Poesie di Francesco Gritti in dialetto veneziano.djvu |
| Edission e fonte ▼ |
Diseva al Timo l'Edera
Su l'alba, sta matina:
Povera piantesina,
Più che te vardo, vissere,
5Più ti me fa pecà;
Ti, e to fradelo Ditamo,
Ve alzè una quarta apena;
Destirè pur la schena,
Ma galinete pepole,
10Dovè cufarve là;
Almanco mi, col rovere,
Pianta dileta a Giove,
Vado... saveu fin dove?
A stafilar le nuvole
15Che sporca el viso al ciel! —
— Vero; lassù vedendote
Corer a torte 'l primo,
Vero (responde 'l Timo)
Stava sul cuor l'invidia
20Per travasarme 'l fiel;
Ma megio esaminandome,
Ho dito: me vergogno;
Mi no go alfin bisogno
De tor in prestio crozzole;
25So star in pie cussì.
Za quando nasce l'Edera
Dai roveri lontana,
In cao la setimana
Ghe dise Timo e Ditamo:
30Schiao, pepola, bondì.