El Progeto de l'Aseno

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
El Progeto de l'Aseno
XVIII secolo

 Edission original:   

Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817

 Fonte:

Indice:Collezione delle migliori opere scritte in dialetto veneziano 6.djvu

Edission e fonte ▼
[p. 66 modifica]
EL PROGETO DE L'ASENO


Diseva un Aseno
     Ben bastonà:
     No gh'è giustizia,
     4Nè carità.
Perchè mo a Trotolo,
     Can del fator,
     Tante mignognole,
     8Tanto favor?
Tuti lo cocola,
     Vien qua, tè-tè,
     Buzzolai, zuchero,
     12Cipro e cafè;
E a mi che strussio
     Più d'un stalon,
     Povero diavolo,
     16Pagia e baston!
Quai xe i so meriti
     Voria saver?
     Mi no so vederli
     20Da cavalier.

[p. 67 modifica]

Alzarse e meterghe
     Le zate in man,
     Saltarghe ai totani,
     24Farghe bacan;
Star come i omeni
     Col peto in su,
     Licarghe in gringola
     28Dal ron al cu...
Ma se ste buscare
     Lo fa regnar,
     Per cossa m'oi
     32Da desperar?
E grazie e spirito
     Anca mi go...
     Orsù, provemose...
     36Lo imiterò.
E la so massima
     Fissà cussì,
     La mete in pratica
     40L'istesso dì.
Torna da Vespero,
     O dal Perdon,
     Col padre Ipolito
     44El so paron!
Co vede l'Aseno
     Ch'i è là ch'i vien,
     Se mete a l'ordene,
     48Se posta ben;

[p. 68 modifica]

E su drezzandose
     Lesto e gentil
     In perpendicolo
     52Da campanil,
Spalanca in ipsilon
     Le zampe, e zo;
     Al colo butase
     56De tuti do.
Li basa e strucola
     De vero cuor,
     Li imbava e imbrodola
     60Da far oror.
Misericordia!
     Ajuto! oimè!
     E a gambe in aria
     64Va tuti tre.
Ma Biasio e Tofolo,
     Toni e Martin,
     Chi armà de latole,
     68Chi armà de spin,
Come a Venezia
     Sul bacalà,
     Pesta su l'Aseno...
     72I l'à copà.
Par che sta favola
     Ne vogia dir,
     Che del so circolo
     76No s'à da uscir.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_Progeto_de_l%27Aseno&oldid=41625"