El Paralitico e l'Orbo

by Francesco Gritti

3 El Paralitico e l'Orbo Francesco Gritti XVIII Apologhi Indice:Raccolta di poesie in dialetto veneziano 1845.djvu Altra edizion: El Paralitico e l'Orbo (1817)

Francesco Gritti

El Paralitico e l'Orbo

XVIII secolo

Edission original:	Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845
Fonte:	Indice:Raccolta di poesie in dialetto veneziano 1845.djvu

Edission e fonte ▼

Altra edizion: El Paralitico e l'Orbo (1817)

EL PARALITICO E L'ORBO.

1Viveva a Balsora,
     Cità de Persia,
     Trent'ani fa
     Do miserabili,
     Che proprio merita
     Celebrità.
2Un gera strupio
     E paralitico
     Desnombolà;
     E l'altro un inclito

     Professor d'otica
     L'aveva orbà.
3Quel stava imobile
     Vicin a un gatolo
     Abbandonà;
     Se 'l tenta moverse
     El casca in sincope,
     El fa pietà.
4Tuti el comisera,
     Nè ghe fa un'anima
     La carità.
     La fame 'l rosega,
     La rabia el sofega,
     L'è desparà.
5L'orbo a una betola
     Da terza a vesparo
     Stava pusà,
     De drento i crapola,
     Ma gnanca tossego
     Nissun ghe da.
6Se 'l va, el precipita;
     La gola el stracola
     Se 'l resta là;
     Almanco avesselo
     Quel can da foleghe
     Che i ga copà!
7L'era el so codega
     Da lu in tei bozzoli
     Sempre menà;
     L'aveva in picolo
     Provisto al mastego,
     E sbezzolà.
8Pianzendo a lagreme
     Su la so perdita
     Col cuor strazzà
     A pie d'un alboro
     Col paralitico
     El s'à trovà.
9Conforta i poveri
     L'aver dei miseri
     In società.
     Le so disgrazie,
     Interompendose,
     I s'à contà.
10Dopo che al diavolo
     I richi stitici
     I ga mandà;
     Par che ne l'anima

     Ghe piova el netare;
     I chiapa fià.
11Al paralitico
     Dise co spirito
     L'orbo: «vien qua:
     Ai pover'omeni
     L'ira, la colera
     No à mai giovà;
12Richezze e feudi
     Se a pochi stolidi
     Ga el ciel donà,
     D'inzegno fertile,
     D'astuzie prodigo,
     Co nu l'è stà.
13El cuor dei omeni
     No è minga in Persia
     Disumanà;
     E po le femene
     Tien sempre catedra
     De umanità:
14Amigo, credime,
     Tanto xe un talaro
     Che do metà.
     D'acordo unimose
     Sposemo i cancari,
     Le aversità.
15Gambe per moverme
     Mi go; per vederghe
     Ochi ti ga.
     Saremo i organi
     De indispensabile
     Necessità.
16Levite in aria:
     Su in spala; pusite...
     Cussì se fa.
     Varda che pupole!
     Ste gambe crozzole
     Per ti sarà;
17Ti per mi esanima
     Con ochio vigile
     Dove se va;
     E l'orbo intrepido,
     Dove te comoda,
     Te porterà.
18Do corpi inabili
     Un san e vegeto
     Cussì à forma;
     I cerca, i furega

     Tuti i viotoli
     De la cità.
19Da quel spetacolo
     Mossa la publica
     Curiosità,
     Se afola el popolo,
     E le limosine
     Ga scravazzà.