Destruza i venti tutti i campanieli

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
←  Ho tanto l'intelletto desfrassao Edission e fonte ▼ Epitaphii  →
[p. 62 modifica]
DESPERATA QUARTA.


Destruza i venti tutti i campanieli,
     E le montagne caza ruinae,
     E le donne no faga mai fieli.
Vegna in tre dì le fontane sechae,
     E i albori si no renda mai fruto,
     E le herbe sia tutte brustolae.
Ogni oselo si romagna muto,
     E i boschi ghe intra el fuogo drento,
     E'l Sol se mostra sempre scuro, e bruto.
Vegna un gran taramoto con spavento,
     Che buta sotto sora le fortezze;
     E le nave si vaga contra vento.
Ognun sia privo de feste, e legrezze,
     E chi no crede che sia el Paradiso,
     Possa morir da doia, e da gramezze.
Vegna si cara la stamegna, e'l griso,
     Che chi se vorà far di vestimenti,
     Venda un palazzo, a vestirse de biso.
Ogni usurer ghe caza tutti i denti,
     E i puti d'un mese parla schieto,
     E i peltri si no vegna mai lusenti.
Vegna tutte le niole in tun sacheto,
     E l'arcombe deventa una luganega,
     E canta a libro el mio satineto.
Ogni manera, e martel se desmanega,
     Le bolpe daga el cibo a le galine,
     E tutti i lieuri si me salta in manega.

[p. 63 modifica]

Vegna pasta le spae, e le coracine,
     E deventa le arme spagho, e azze,
     E sia pien de cinedi le berline.
Ogni gran Re vaga vestio de strazze,
     E i fiumi cora tutti qanti in drio,
     E sia i pozzi pieni de scovazze.
Vegna tigre ogni picolo cunio,
     E i pesci che se pia su la marina,
     Se trova sempre da vuove, e da rio.
Ogni zonchià, ogni late, e puina
     Se trasforma in mossoni, e in peocchi,
     E vegna un cervo la mia gatesina.
Vegna le gome drento di zenochi,
     A tutti i Avocati magnaori;
     E che i sia pien el corpo de ranocchi.
Ogni morte ghe vegna a i traditori,
     E sia scanao chi ha in odio la vertue,
     Crepando da dolor i adulatori,
Vegna tante cigogne, e tante grue,
     Che becca el cuor de chi me fa stentar;
     Za che le zente no vien cognossue,
Ogni candela no se possa brusar,
     Le piere si deventa gambareli,
     Azzo che no se possa faricar;
E l'azzal si deventa menueli.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Destruza_i_venti_tutti_i_campanieli&oldid=56024"