Al letór
|
Edission original: |
Molena Spinacarpio, Bordizàndo, rime veneziane, Venezia, 1903 |
|
Fonte: |
Indice:Spinacarpio Moléna, Bordizàndo, rime veneziane, Venezia, 1903.pdf |
| Edission e fonte ▼ | Metempsicósi → |
Mi, da picolo, gò avúda
per un toco uná passión
credo, poco conossuda...
mi pestavo del matón:
a la piera del camín
come un musso sfadigava,
e, co'l gera pestà fin,
zò in tamiso, e tamisava.
Per dei mesi la storiela
xe duráda, e col matón
de sta razza de canéla
ghe n'ó fato su un cassón;
e sto colmo alfin ragiunto,
contentón mi go pensà
ch'ormai fusse rivà 'l punto
de butárla sul marcá.
Ma siór si, mo', che, pardiána,
mentre zogie avér credeva
m'à tocà la cossa strana
che nissún no la voleva!
E ricordo che un bel toco
so' restà piutosto mal:
finchè pò, zà, tuto el bloco
xe finído int'un canál.
Ani e ani xe passà
da l'afár de quel cassón,
epúr mi no so' cambia:
pesto ancora del matón;
spezialmente, letór mio,
quando ai versi coro drio:
ma xe questo el mio destín...
vardarò de péstar fin.