Afári veci
|
Edission original: |
Molena Spinacarpio, Bordizàndo, rime veneziane, Venezia, 1903 |
|
Fonte: |
Indice:Spinacarpio Moléna, Bordizàndo, rime veneziane, Venezia, 1903.pdf |
| ← La Medúsa | Edission e fonte ▼ | El mar → |
Ninéta, te ricórdistu?
Se gera a vilegiár:
e un fia' sentái s'avevimo
quel giorno a riposár:
gera nel çielo splendido,
el sol a mezogiorno,
e là sentái gavevimo
una gran pase atorno.
Limpido un rusceléto
passava da viçin
co' un mormorío discreto
tranquilo, senza fin:
darénte, sora i álbori,
dei canti d'oseléti...
a l'ombra fresca stevimo
pusái su l'erba queti.
E i bei to cavéi biondi
in rizzi i te cascava,
e i oci tui profondi
el çielo i contemplava,
e sora al peto vergine
ti ti portévi un fiór...
el so profumo un balsamo
pareva del to cuór.
Mi te vardava in estasi,
e de sognár credeva:
fora al to viso candido
ormai più no vedeva:
sentiva dentro ai timpani
tuta una confusión,
el cuór int'un gran palpito,
la testa in rebaltón,
fin che pò al colo, adasio,
un brazzo t'ò passà,
e su la boca d'anzolo
tremando t'ò basà.
. . . . . .
. . . . . .
. . . . . .
. . . . . .
Nina, xe passà i ani,
e mi so' ben cambià;
fastidi e disingáni
no me ne gà mancà:
el pan de mestro publico
da amaro un poco el sà...
ma, in cuór, quel'ora d'estasi
Nina, xe sempre là.
Che se fra spine e triboli
gh'è in tera qualche fiór,
el gà, zà, le so lagrime,
ma ne lo dà l'amor.