Povara tosa!
|
Edission original: |
Attilio Sarfatti, Le Rime Veneziane e Il Minuetto, Milano, Fratelli Treves Editori, 1892 |
|
Fonte: |
| ← XXI. Te vestirò d'arzento tuta quanta | Edission e fonte ▼ | XXIII. Mi te diseva: cocola, tesoro → |
POVARA TOSA!
1
Drento la to botega da sartora
Ti lavoravi, Cate, tuto el dì.
No ti lassavi l'ago che a quel'ora,
sempre a quel'ora che passava mi.
Povara tosa! e adesso scampo via
Co toco quel canton de Frezzaria.
Xe giusto un ano ancuo che ti xe morta,
Che no te vedo più su quela porta!
Xe giusto un ano ancuo che ti xe morta,
Ma te go sempre viva drento el cuor.
Nissun divertimento me conforta,
Tuto me crussia, tuto me fa oror.
Se vado a spasso, o in gondola, o al cafè,
Subito penso: e Cate no ghe xe.
E Cate a San Miciel1 i l'à portada,
La mia povera Cate inamorada.
Oh maledeta l'ora e maledeto
El zorno che ti è morta, Cate mia!
Go sempre in mente el to povaro leto,
El to afano, el to mal, la to agonia.
Pochi momenti prima de morir
Ti m'à volesto, Cate, benedir,
E ti à pusà la testa sul mio sen,
Disendome: cussì me sento ben.
- Note a cura de l'autor
- ↑ Si chiama così il cimitero veneziano.