ATTO PRIMO
Sala con due porte laterali, ed una in mezzo. Quella a destra corrisponde all'appartamento di Bettina; quella a sinistra all'appartamento di Giulia; quella di mezzo la porta comune.
SCENA PRIMA
Tonina, Angiola, e Marianna.
Ton. Anemo, Siore, andemo, che 'l tempo va, che 'l svola.
Ang. Dove avemio d'andar?
Ton. Che maraveggie? a scola.
Mar. Da merenda, Tonina, e vegno co ve piase.
Ang. Sempre a scola! l'è longa: lasseme un zorno in pase.
- L'è meggio esser galline, che donne, in verità:
- Almanco le galline a scola no le và.
Ton. Sentì la siora Squinzia, sentì la Dottorina:
- S'intende, che a sta musica ghe semo ogni mattina.
- Vostra zermana almanco la ze da struccolar,
- La ze de vu più piccola, nè la se fa pregar.
- Siora Anzoletta, andemo, che se no se più bona
- Chiamo la siora Mare.
Ang. Anca la Siora Nona.
- L'è tropo fredo ancuo, tremo con una foggia,
- Menè a scola Marianna, che mì no ghe n'ho voggia.
Ton. Pissotta malegnaza! A scola tutte dò.
- Se no ghe n'avè voggia, vegnir ve la farò.
- Anemo quà. La prende per la mano.
Ang. No voggio.
Ton. Quà, frasca insolentissima.
Ang. No voggio.
Ton. Quà.
Ang. No voggio.
Ton. La senta mo, Lustrissima.
Mar. No fe, cara Tonina: la vien, la ze contenta.
Ton. Gnanca se i la copasse. Lustrissima, la senta.
