Pagina:Alghe della laguna.djvu/6

Da Wikisource
Sta pagina la xe stà trascrita e rileta.
MAGARI!


Nina, se el Cielo che vede i cuori
El te ispirasse sto bel pensier,
De lassar tuti sti baticuori
De andar lontani de sto vesper,1
De viver soli de là dei mari....
6Magari, Nina! Nina, magari!

Un'isoleta tranquila e quieta
Senza teatro, senza festin,
Co un orteselo, co una caseta,
Co una spaliera de zensamin,
E amarse sempre senza lunari....
12Magari, Nina! Nina, magari!

I rossignoli, le lodolete
Farave el nido sul to balcon,
E i polesini faria bao-sete2
Senza paura, ne sudizion.
Oh! benedeti, ne xeli cari!...
18Magari, Nina! Nina, magari!

Forse l'esempio farave efeto,
Ti me amaressi, Nina, anca ti,
E nasserave qualche anzoleto
Zogia e speranza dei nostri dì....
Oh! che delizia che no ga pari!
24Magari, Nina! Nina, magari!

  1. Vesper: vespajo.
  2. Far bao-sete: far capolino.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Alghe_della_laguna.djvu/6&oldid=61663"