Le Quatro Stagion Campestri e Citadine/L'Istà Campestre

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.

[p. 333 modifica]


L'ISTÀ CAMPESTRE.


1Oh primavera,
     Putela bela,
     Xestu più in tera,
     Xestu più quela?
     Dov'estu, nonola,
     Coss'è de ti?
2Forse tra i verdi
     De le campagne
     Ti ti te perdi
     Co le compagne,
     Nè più visibile
     Ti xe per mi?
3O dei boscheti
     Fra l'ombre care,
     De bei fioreti,
     D'erbete rare,
     Ti va fornindote
     La testa e 'l sen?
4O ne le grote
     Ti bali e canti
     Co ste putote;
     Ti burli i amanti,
     Ti cori a sconderte
     Co Clori vien?
5Compagna bela,
     Caro boscheto
     Sta baroncela,
     Parleme schieto,
     L'au vista a sconderse?
     Xela co vu?

[p. 334 modifica]

6Ma la campagna
     No rispondeva,
     Bosco e montagna
     Tuto taseva,
     Ben sospirandola,
     Ma gnente più;
7La xe scampada
     No l'è più in tera;
     Fra la zornada,
     Nè su la sera,
     No vien più i zefiri
     A svolazzar.
8Ne più l'aurora
     Su la matina
     Ve spruzza fora
     Rosada fina,
     Nè più le tortore
     Sa smorosar.
9Ah! so sorela
     Vien vitoriosa,
     Fiera, ma bela,
     Tuta maestosa
     E 'l mondo domina
     La bionda istà.
10L'à vista i campi
     E le coline,
     Fra mezzo ai lampi
     Le nevi alpine
     Za saludandola
     S'à descolà;
11I prai che gera
     Smaltai de fiori,
     Che a primavera,
     Che a cento amori,
     Tante delizie
     Saveva dar,
12Abandonai
     Xe ancuo da Flora,
     Tuti arsirai
     Se sbrega fora:
     Fin le so viscere
     Podè osservar.
13Solo superbe
     Vedè le biave
     In mezzo a l'erbe
     A far le brave,
     Paonizzandose
     Del so color.

14Cari agneleti
     Scampè nei boschi,
     Cerchè i secreti,
     Cerchè i più foschi,
     Dove no penetri
     Tanto calor.
15Ve sarè in massa,
     Sbassè la testa?
     Ma el sol ve passa,
     Ma el sol ve pesta,
     Nel bosco a sconderve,
     Cari, corè.
16Scampé, toreti,
     Del sol el lampo,
     Scampè, cavreti,
     Scampa, Melampo,
     Tramezzo ai albori,
     Ne l'acque andè.
17Ma l'istà el fogo
     Col sol radopia
     Per ogni logo,
     Muragia dopia
     No val piu a sconderve,
     Per tuto el vien;
18Pur dal contento
     No toca tera
     Quei che al fermento
     Ghe fa la guera.
     E alegra l'anima
     Ghe sbalza in sen.
19O vu beati,
     Cari vilani,
     Che smoderati
     Pensieri vani
     No ariva a sconderse
     Drento de vu!
20Sè i fìoi dileti
     De la natura,
     Chi ve fa abieti,
     Chi no ve cura,
     Cossa sia lagreme
     Conosce più.
21Ti dal cuor belo,
     Dolce mia Nina,
     Vian dove el cielo
     Pase destina,
     La bionda Cerere
     A contemplar.

[p. 335 modifica]

22I alti muri,
     Le strade strete;
     Ai venti puri
     Mai no permete
     L'aria balsamica
     De trasportar.
23La cità scampa,
     Za che ti senti
     Del sol la bampa,
     No te spaventi,
     Che qua gh'è un alboro
     Nato per ti;
24Se ti vedessi
     Come che 'l spande
     I rami spessi
     Da varie bande!
     El sol no penetra
     De mezzo dì.
25L'è folto e largo,
     De vissolete
     L'è tuto cargo,
     In cestelete
     Farò sunartele,
     Te le darò.
26Là el venteselo
     Farà frescheto,
     Là un baso belo
     Su quel viseto...
     Ma ti va in colera?
     No, nol farò.
27E po in quei zorni,
     Che i oseleti
     Va come storni
     Drento ai boscheti,
     E sente el turbine
     Benchè lontan,
28Nu lassaremo
     L'albero e i campi,
     E vedaremo
     Lontani i lampi,
     E a gropi i nuvoli
     Vegnir pian pian;
29E dai balconi
     Del casineto,
     Dopo dei toni,
     In altro aspeto
     Natura, o cocola,
     Ti vedarà.

30Che quela piova
     Vegnua dal cielo
     Tuto rinova,
     Tuto fa belo,
     Le piante, i albori,
     I campi, i prà.
31Ah se scampada
     Xe primavera,
     Ti ti è restada,
     Ti ti xe in tera,
     Ti che t'imbalsemi
     Col respirar!
32Sì, dal cuor belo,
     Dolce mia Nina,
     Vien dove el cielo
     Pase destina,
     La bionda Cerere
     A contemplar.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Le_Quatro_Stagion_Campestri_e_Citadine/L%27Istà_Campestre&oldid=44426"