Le Quatro Stagion Campestri e Citadine/L'Autuno Citadin

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.

[p. 342 modifica]


L'AUTUNO CITADIN.


          Spogia è la pergola,
               L'ua vendemiada,
               Finio xe 'l bagolo,
               E la secada
               5De quele femene,
               De quei putei,
               Che va sporcandove
               Co dei granei.
               No più le strade
               10Xe semenade
               Da miserabili
               De contadini;
               No più ve stomega
               L'odor dei vini;
               15Ogni borgada
               Xe frequentada
               Da zente nobile
               Ben educada.

[p. 343 modifica]

               Fra mezzo i albori
               20Xe trasportà
               La vita e 'l spirito
               De la cità.
          Andemo a goderse,
               Bela Nineta,
               25Vedistu, cocola,
               La gondoleta?
               La xe una scatola!
               Se trovaremo,
               Proprio in t'un atimo,
               30Dove voremo.
          Co fazzo un moto
               Xe tacà soto.
               Do cavai scapoli
               Sbate la zampa,
               35Ti monti subito,
               La tera scampa,
               E più d'un mio
               Za xe finio;
               Le sedie, i mantesi,
               40Lassemo in drio,
               E senza acorzerse
               De caminar;
               No par de moverse,
               Ma da svolar.
          45Nineta amabile,
               Per no stufarse
               A Padoa a l'opera
               Se pol fermarse,
               E qualche circolo
               50Trovar de zente;
               Veder chi è scapolo,
               Chi ga el servente,
               Chi xe ben messa;
               Zogar in pressa
               55Co quei che capita
               Una partia;
               Magnar le lodole
               In compagnia
               De done amabili;
               60De chi xe in fregole
               Senza contanti
               Sentir l'istoria;
               Dopo partir,
               E in vila subito
               65Se va a dormir.

          Oh! che delizia
               Xe la campagna!
               Cussì godendola
               Se se sparagna
               70De veder zente
               Mezza pezzente,
               Rusteghi, stolidi,
               E sempre sporchi,
               Nè le so femene
               75Che par tanti orchi!
               Goda i patetici
               Sta bela vista:
               Goda d'un eremo
               El tristo oror
               80Chi no ga un'anima,
               Chi no ga un cuor.
          Te lo assicuro, Nina,
               Che za te pararà
               D'esser sempre in cità;
               85Che chi te adora
               Apena desmissià
               Verso del mezzodì,
               O, se te piase a ti,
               Più tardi ancora,
               90Ordinarà i cavai,
               E in quel mio bel batar
               Andaremo a trotar
               Che svolaremo.
          Se incontrarà per strada
               95Diese altri legni e più,
               E qualchedun co nu
               Convogeremo;
               E zonti a la Batagia,
               Dove el gran mondo gh'è;
               100Trovaremo el cafè
               Zepo de zente.
               Là molti dei to amici
               Te se presentarà,
               E za i te vegnarà
               105Tuti darente.
Là no passa un minuto secondo,
     Che no arivi da novo del mondo:
     Là se trova la zente de spirito,
     Là svolazza per tuto l'amor.
     110Tra le bave un amante geloso,
     Se descola un galante smorfioso,
     E se chiassa, se ride, se critica,
     E chi è toco se vede in furor.
          A stopa, a bazzega,

[p. 344 modifica]

               115A panfileto,
               A quel petegolo
               De bel zogheto,
               Che tanto stuzzega,
               Che impegna el cuor,
               120Se rischia i talari
               De bon umor.
          Ti po, stufandote,
               Ti sunarà
               Sete, oto, dodese,
               125Chi ti vorà,
               Che cavalcando,
               E galopando,
               Opur in bagherle
               O in sediolin,
               130O drento a un anglico
               Bel carozzin,
               Per seguitarte
               E cortegiarte
               Farà scapate,
               135Farà volate;
               Tuti fumanti
               Te andarà avanti,
               Tornarà indrio,
               Ti, saludandoli
               140Col più gran brio,
               Come una Venere
               Fra cento amori
               Ti sarà l'arbitra
               De tuti i cuori;
               145E senza acorzerte
               De aver trotà
               Ti sarà Venere
               Sul to sofà.
          Ordinaremo in tavola;
               150Pronto sarà el disnar,
               Ti ne farà sentar
               Dove te agrada.
               El salpicon coi brocoli,
               Pernise col salmi,
               155(Quel che te piase a ti)
               La caponada,
               L'artese
               L'ostreghe,
               E le tartufole,
               160La bona malega,
               Quanto che fussimo
               Nela cità,

               Nineta amabile,
               Ti trovarà.
               165Tuti insieme parlaremo,
               Chiassaremo,
               Ridaremo,
               Senza mai saver perchè,
               Sin a l'ora del cafè.
          170Dopo quelo e 'l rosolin
               Ti te eclissi a pian pianin,
               E ti va nel to retrè,
               Dove gh'è
               Le vicende de le bele
               175In più stampe baroncele;
               E quel caro to sofà
               Dal piacer imbalsemà,
               Dove Venere e so fio,
               Che sia tanto benedio,
               180Che invisibile ne ascolta,
               S'à trovà più d'una volta.
               Là pensando,
               Pisolando,
               Consultando,
               185A la toleta
               Co la brava to Liseta,
               Ti starà circa un'oreta.
               Nu fra le chiacole,
               E 'l faraon,
               190Fra 'l torse bagolo
               D'un stolidon,
               Che a farne visita
               Xe capità.
               Sta oreta critica
               195Se passarà.
Nina bela za torna da basso,
     De carozze se sente el fracasso;
     Tuti lassa le carte e le chiacole,
     E se torna da novo a trotar,
     200Za xe scuro, za el sol xe andà drento,
     Ma i farali, ma i torzi da vento
     El cortivo e la strada v'ilumina,
     Che podè tuti i sassi contar.
I cavali tol su la cariera,
     205E le rode ve brusa la tera,
     In cità se se trova in t'un atimo,
     E le scurie se sente a schiocar.
     Al cafè de cavanela
     Smontarè, Nineta Bela,
     210Ve saremo tuti arente,

[p. 345 modifica]

               Che bel scial, che bel turbante!
               E 'l to modo, el to parlar,
               Li farà tuti incantar.
          Se sbrufa l'altre done
               215No ti ghe pensarà,
               E ti trionfarà
               Del so rabiezzo.
               Diese da novo atorno
               Te se presentarà,
               220Che te regalarà
               D'un qualche vezzo.
          Ma se alzaremo,
               Spassizzaremo,
               E cambiaremo
               225Do o tre cafè,
               E a l'ora solita,
               Che va el bon ton,
               Se andarà l'opera,
               Dopo al veglion.
          230Se Nina amabile,
               La bela Mina,
               Ve bala el bolzere,
               La manferina,
               Le grazie a sconderse
               235Va in t'un canton,
Piemontesi, polache, alemane,
     Savogiardi, fandanghi, furlane,
     Contradanze, e i baleti de l'opera
     Balaremo, e faremo balar.
          240Tuta infogada,
               E scalmanada,
               Come l'aurora
               Co la vien fora
               Nunzia del dì,
               245La bela Nina
               Sarà cussì.
          Po co stracandote
               Ti finirà,
               Un sito comodo
               250Ti trovarà,
               E circondada
               Da diese, dodese,
               Co mi sentada
               Ti torà, languida,
               255La limonada;
               Qualche gelato
               De bon cedrato,
               E ogni altra bibita

               Te sarà pronta,
               260Ch'ecita i muscoli,
               E li rimonta.
          Ti balarà da novo
               Insin che nasce el di,
               E po in tel to scialì
               265Sconta, imbautada,
               E dal piacer sfinia,
               Ti montarà in batar,
               Senza poder parlar
               Tuta la strada.
          270Dirò che ti xe cara
               Sin co te manca el fià;
               Ti me ringraziarà,
               Ma con un moto.
               Te torò zo dal legno,
               275E ti andarà a dormir;
               Ti me farà sentir
               L'adio, ma roto.
          Oh che delizia
               Xe la campagna!
               280Cussì godendola
               Se se sparagna
               Qualunque incomodo,
               Nè se presenta
               La solitudine
               285Che ve spaventa.
               Cussì ad ognuno
               Piase l'autuno,
               No per le pergole
               D'ua tute piene,
               290(Che goda i bamboli
               Ste bele scene)
               Ma perchè unito
               Xe el più compito,
               El più sociabile
               295Mondo pulito,
               Le done amabili
               De la cità,
               El più bel spirito
               Xe radunà.
               300Ma 'l dì de san Martin,
               Nineta, xe vicin.
               Za xe deciso,
               Che in novo carozzin
               Sul corso de Treviso
               305Quel dì figureremo;
               E quatro bei cavai,

[p. 346 modifica]

               Bagio scuro, pomà,
               Ghe tacaremo.
               Do cochi ben montai,
               310Do stafieri, el zachè,
               E quei d'arsan plachè
               Bei fornimenti;
               Fra tuti i pretendenti
               Che al corso ghe sarà
               315Se ne distinguarà
               Come intendenti.
               Za la matina,
               Mia cara Nina,
               Saremo stai,
               320Col batar solito,
               E do cavai
               O sin al rovere,
               O a sant'Artien,
               Dove che vien
               325El megio e 'l bon,
               La zente nobile,
               E 'l più gran ton.
Semo in borgo, e su tuti i balconi
     Ghe xe strati, damaschi e festoni,
     330E dei miera de done e de omeni,
     Che no pol in carozza trotar.
Soto i porteghi po a la refusa
     Gh'è la zente più bassa confusa,
     Che se spenze, che s'urta e formigola,
     335Per poder le carozze vardar.
Tute quante le rozze da nolo,
     Le veture da romperse el colo,
     Xe missiae con i treni più nobili,
     Che più beli li fa deventar.
340Ma 'l fracasso la strada za stropa;
     Cento legni se incontra, s'ingropa;
     Se biastema dai cochi, e se strepita,
     Che la pausa no i pol tolerar.
               Fissaremo in sto mumento
               345Tuti i legni, e chi gh'è drento,
               Osservando,
               Criticando,
               Ridachiando
               A più poder.
               350Nova spezie de piacer!
               Ma roto el gropo,
               Tolto l'intopo,
               Vien fora i Ussari,
               Che de cariera

               355Brusa la tera.
               Co la so sciabola
               Facendo segni,
               Metendo in linea
               Cavai e legni;
               360Se sente el mascolo,
               Se mola i barbari,
               Che come un fulmine
               Vedè a passar,
               E tute el popolo
               365Sentì a cigar.
               No serve de saver
               Chi è stà che à guadagnà;
               La zente bassa el sa,
               Che in bota è sta cigà
               370La lista e i premi.
          Nu, do tre ziri al più,
               Ora zozo, ora su,
               Cara, faremo,
               E po desmontaremo
               375Dal gobo o da Bastian.1
               Te vegnarà a dar man
               Chi te conoscerà,
               Che za ghe ne sarà
               Set'oto almanco.
               380Sarò anca mi al to fianco,
               Urtarò, spenzarò
               Fra quela zente;
               Farò anca l'insolente,
               E tanto spenzarò
               385Sin che te trovarò
               Carega o scagno.
               Un gelato,
               O maraschin;
               O cedrato,
               390O mascarin,
               Quel che in soma ti vorà,
               Nina mia, ti gavarà.
          Ma 'l pranzo ne aspeta,
               Mia bela Nineta,
               395Quaranta e anca più
               No aspeta che nu.
               Mi no credo che ghe sia
               Tanto cara compagnia
               Quanto quela che gh'è là.
               400Se magnarà,
               Se bevarà,
               Se parlarà,

[p. 347 modifica]

               E faremo un cocodè
               Come in l'arca de Noè.
          405Terminà che sia el disnar,
               Senza gnanca saludar,
               Co quei pochi che te piase,
               Andaremo in santa pase
               E al cafè, a la cavalchina,
               410Se starà sin la matina.
          Oh che delizia
               Xe la campagna!
               Cussì godendola
               Se se sparagna
               415Qualunque incomodo,
               Nè se presenta
               La solitudine

               Che ve spaventa.
               Ma za sparisce,
               420Diminuisce
               El mondo nobile,
               La zente colta:
               Tuti ripatria,
               Tuti xe in volta:
               425Anca Nineta
               No sta più quieta,
               Che 'l malinconico
               No la dileta;
               E donca subito
               430Se passarà,
               A le delizie
               De la cità.





Note da l'edizion del 1845
  1. Furono notissimi caffettieri in Treviso; la bottega del secondo esiste ancora.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Le_Quatro_Stagion_Campestri_e_Citadine/L%27Autuno_Citadin&oldid=44442"