La settimana santa

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
La settimana santa
1760

 Edission original:   

"Tutte le opere" di Carlo Goldoni; a cura di Giuseppe Ortolani;
volume 13, seconda edizione; collezione: I classici Mondadori;
A. Mondadori editore; Milano, 1955

 Fonte:

http://www.liberliber.it/mediateca/libri/g/goldoni/componimenti_poetici/pdf/compon_p.pdf

Edission e fonte ▼
I


Oh co presto che passa i zorni e i mesi,
E s'acostemo a l'ultimo confin!
L'ano (cossa diseu, caro MILESI?)
Per MARIA SERAFINA è zonto alfin.
Lontan l'ano passà da sti paesi,
Per el vestiario ho sfadigà un tantin,
E adesso che la fa la profession,
Se no torno a cantar no paro bon.

II


Ma son de quel medesimo pensier,
Che sia inutile cossa i versi e el canto,
Per una che se sera in monestier,
Piena de penitenza e d'amor santo.
Fato ho a Roma per ela el mio dover,
E a Venezia ho pensà far altretanto.
Là ho visita le SETTE CHIESE, e qua
La SETTIMANA SANTA ho consacrà.

III


La Domenega donca de l'Olivo
Principiando sta santa devozion,
Son andà a messa un poco bonorivo,
E ho assistio de le Palme a la fonzion.
Dopo la messa a San Francesco arivo,
Dove andava la zente a procession,
E ascolto el PASSIO, e in tun canton me meto
Con devota pietà mista al dileto.

IV


Sun un pulpito sento el sacro testo
Cantà con ose fervida sonora;
Da l'altra banda in ton lugubre e mesto
Sento un Padre che canta, che inamora.
E la turba in tun coro agile e presto
Da lontan se sentiva a saltar fora,
E a quel canoro dialogo diviso
Me pareva la chiesa un Paradiso.

V


In quel incontro me vegniva in mente,
MARCO, le nostre amabili TERESE,
Che con bel' armonia soavemente
Cantar la Messa qualche volta ho intese.
El canto, se sol dir comunemente,
Le anime mostra de la gloria acese,
E se in tera a cantar le xe perfete,
Per i cori del Ciel le sarà elete.

VI


Finido el PASSIO, al resto de la Messa
Son restà co la mente a Dio racolta,
E per sta puta co la fede istessa
Ho pregà Gesù Cristo anca sta volta:
Signor, disendo, el dì che la professa,
Fe che la sia nel vostro sen acolta,
E formando el tremendo zuramento,
Asistèla, Signor, nel gran momento.

VII


Dopo d'aver disnà, per far del ben,
Son andà a l'Oratorio ai Mendicanti,
E ho asistido anca mi, come convien,
A lodar el Signor tra soni e canti.
Proprio me giubilava el cuor in sen,
Tanti strumenti in ascoltar brilanti
E tante ose angeliche perfete;
E le brave le giera almanco sete.

VIII


Ma tra queste, per dir la verità,
Una certa Laureta Risegari
Dolcemente in tel cuor m'ha penetrà
Con quei so trili risonanti e chiari.
MARCO, no stessi mai, per carità,
Su sta mia compiacenza a far lunari:
Che pol mover del canto la dolcezza,
Ogni cuor santamente a tenerezza.

IX


Bel sentir: Cara vox! O vox beata!
Musica del bravissimo Bertoni!
Che bela ose veramente grata
Da far stordir i musichi più boni!
Neta nei piani, ferma e delicata,
Pronta nel passeggiar per vari toni.
E a le cadenze? Oh Dio! che abilità!
E, quel che stimo, no la chiapa fià.

X


Tra i onesti piaseri, el dolce canto
Qualche volta da Dio ne vien permesso
Per poder dir: se qua sentimo tanto,
Cossa sarà nel Paradiso istesso?
Co sto pensier, che me par giusto e santo,
La musica ho godesto, lo confesso,
E quando l'Oratorio è stà fenio,
Ho ringrazià missier Domenedio.

XI


Gera esposto el SANTISSIMO a l'altar,
E ho dito, inzenochià, con devozion:
Signor, no son vegnù per el cantar,
Ma per far un pocheto de orazion.
Per MARIA SERAFINA vôi pregar:
Deghe la vostra pia benedizion;
Fe che adesso tra i canti la ve loda,
E che un zorno nel Ciel l'esulta e goda.

XII


El Luni de matina son stà in casa
Per la Pasqua vesina a parechiarme.
Ma in sto particolar megio è che tasa,
Perché alcun no se mova a criticarme.
Par che a qualche mio amigo ghe despiasa,
E talvolta ho sentio rimproverarme
Perché in publico digo i fati mi:
Ma no so cossa dir, mi son cussì.

XIII


Digo liberamente el ben e el mal,
Publico le fortune e le disgrazie.
E in stampa ha da saver l'universal
Chi me fa bone grazie o male grazie.
Dele teste ghe xe de un natural,
Che d'odio e de velen no xe mai sazie:
Mi per sdegno e livor no me consumo;
Me sfogo in versi, e va la bile in fumo.

XIV


Basta, tornando al Luni, la conscienza
Solo, senza desturbi ho esaminà,
E po dopo disnar, con diligenza,
Ai Incurabili,1 a piè, me son portà:
Dove ho sentio a cantar per ecelenza
Un Oratorio pien de proprietà,
Trato dale parabole divine
Con imagini sante e pelegrine.

XV


Ciampi ha scritto, per dirla, a perfezion,
Concertando i do cori egregiamente
E quele pute ne l'esecuzion
Le ha fato, in verità, stupir la zente.
Tuto m'ha piasso assae, tuto è stà bon,
Oto pute ha cantà, tute valente,
Ma più de tutte el gusto mio dileta
Regina Rossi, detta la Gregheta.

XVI


E un violin m'ha sorpreso a segno tal
Che ho domandà, per vogia de saver,
Se sonava una puta d'ospeal,
O Colonna, o Nazzari, o un forestier.
No credo che se daga un'altra egual,
Franca come sta puta in tel mistier;
La compagna con forza e con valor,
E ale cadenze la ve toca el cuor.

XVII


Quel che ho dito de gieri, ancuo ripeto:
M'ho compiasesto in grazia del Signor,
E dopo quel santissimo dileto,
Ho alzà devoto al Paradiso el cuor.
E con vera fiducia e vero affeto
Ho pregà la bontà del Redentor
Per MARIA SERAFINA, e m' ho sentìo
Dirme una ose: ti sarà esaudìo.
XVIII
Bela cossa el pregar per un'agnela
Pura, inocente, e al so Pastor dileta!
Anca d'un pecator ala favela
Par che Dio se compiasa e se dileta.
E qualche volta col pregar per ela
Grazie a se stesso el pecator aspeta:
Perché la santa Providenza eterna
Move i animi nostri, e li governa.

XIX


La matina del Marti... oimè, vien zente.
Chi me vien a distrar dal taolin?
Manda MARCO MILESI un so servente?
Presto, presto, dè qua quel boletin.
Bravo, bravo, un servizio estremamente
Da lu me preme, e el me lo fa a pontin.
Ma in ultima el me dise del viglieto :
Presto, Goldoni, i vostri versi aspeto.

XX


Donca cossa hoi da far? se vogio dir
Tuto el ben che in sti zorni ho dito e fato,
Dubito assae de no poder fenir,
E no vorave comparir ingrato.
L'opera mia procurerò compir
Somariamente restrenzendo el fato;
Lassando fora, per vegnir al fin,
Le prediche, i sepolcri e el matutin.

XXI


Solamente dirò che el Zioba Santo
A San Marco la sera son andà,
E a forza de pazenzia ho fato tanto
Che in mezo dela chiesa ho penetrà.
In zenochion m'ho retirà in tun canto,
E el SANTISSIMO SANGUE ho venerà:
Sangue, che per miracolo de Dio,
Fora da un crocefisso è scaturio.

XXII


A zigar ho sentio de le donete
Alcune mate, alcune dezzipae;
Quelle che giera ossesse, poverete,
La grazia del Signor le ha liberae.
Le altre maliziose, o pur sempiete,
In tel stato de prima xe restae,
E per farle varir da l'opinion
Ghe vorave el remedio del baston.

XXIII


Inzenochià davanti a quel altar,
Ho dito: Caro Dio miracoloso,
Che avè volesto tanto soportar
Per farne strada al celestial riposo,
I cristiani ve prego liberar
Dal demonio più fiero e tormentoso:
M'intendo dal demonio meridian,
Che tenta con el senso el cuor uman.

XXIV


O MARIA SERAFINA a Dio dileta,
Vu sè fora d'intrigo in sto proposito,
Perché sè per costumi un'anzoleta,
E po sè per el Ciel messa in deposito.
Se savessi, fia cara e benedeta,
Quel che so mi! No ve dirò un sproposito.
De cento rei, che ne l'inferno piove,
Per quel vizio ghe n'è nonantanove.

XXV


Lo crederessi? Fina in quela sera,
Quando andava le Scuole in procession,
Dele done e dei omeni ghe giera
Che altro gh'aveva in cuor che devozion!
E ho visto una parona e una massera...
Basta, no vogio dir, che no par bon.
Ma per chiusa dirò che, a mio parer,
Xe una gran bela cossa el monestier.

XXVI


Solamente voria che fussi stada,
Munega benedeta, in ste do sere,
Zioba e Venere in Piaza, e in qualche strada
A veder quanta profusion de cere.
Arde per cussì dir ogni contrada
Luminando per tuto in più maniere
Ciri, torzi, candele e cesendeli
Porte, rive, balconi e capiteli.

XXVII


El Venere la Piaza comparisse
Bela e stupenda fora de misura,
Molto in tal ocasion contribuisse
L'ordine dela vaga architetura,
E i torzi, che xe messi a dopie strisse,
Che in strada fa parer zorno a dretura,
E sparsi per la Piaza tanti e tanti
Preti, lumi, segnali, e incensi, e canti.

XXVIII


Tuto xe fato a gloria del Signor;
Vera pietà del popol venezian;
E no xe vero, che per farse onor
Vogia spender de più qualche guardian.
Qualche persona de cativo umor
Dixe: Gh'è l'ambizion del cuor uman;
Ma i sarà fursi scarcavali o avari
Quei che fa sti giudizi temerari.

XXIX


In mezo a quel gran mondo e a quei gran lumi,
Co passava el Santissimo coverto,
Coi toriboli avanti, coi profumi,
E col sacro dei preti almo concerto,
Pensando e ripensando ai mi costumi,
Umile, inzenochià, col cuor averto,
Signor, diseva, benché indegno sia,
Vu podé resanar l'anema mia.

XXX


E con quel zelo e quela forza istessa
Che pregava per mi, pregava ancora
Per MARIA SERAFINA, che se apressa
Ogni dì più del sagrifizio a l'ora.
Co la gh'ha el veto, co la xe professa,
No gh'è più tempo da pensarghe alora.
Donca prima de far quel che va fato...
Ma cossa dighio? in verità son mato.

XXXI


Che bisogno ghe xe de dubitar
Dela costanza del so bon pensier?
Xe un ano che la tende a suspirar
Per conseguir sto angelico piaser.
No la sa de sto mondo cossa far;
La so regia, el so amor, xe el monestier;
E nissuna noviza de sto mondo
Gh'averà più de ela el cuor giocondo.

XXXII


Quando la s'ha vestio, qualcossa ho dito
Dele virtù che la nudrisse in peto,
E per no replicar quelo che ho scrito,
Ale mie SETTE CHIESE me rimeto.
Cussì ala madre e al padre reverito,
E cussì a vu, carissimo MARCHETO,
Con quel bon cuor, con quel rispeto istesso,
Quel che ho dito in quel dì replico adesso.

XXXIII


Xe la vostra onestissima famegia
Vera consolazion dei vostri amici;
L'arte de chi li rege e li consegia
Rende i fioi per el più santi e felici.
Certe pute, ve feu de maravegia
Che le perda el so tempo a farse i rici?
No voleu che le studia a farse bele?
Se la mare lo fa pezo de ele!

XXXIV


Spechio xe MARGARITA dele mare,
E spechio dele fie xe le so pute.
Veramente ragaze al mondo rare,
Nate per el Signor tute e po tute.
Le xe a tratarle spiritose e care,
E da omo d'onor no le xe brute;
Al mondo le faria la so fegura,
Ma sto mondo gh'ha parso una fredura.

XXXV


Intendemose ben; no minga el mondo
Come l'ha fato Dio co le so man;
Ma qual l'ha reso d'ambizion fecondo,
Cargo de volutà l'afeto uman.
Viver coi altri saria stà giocondo,
Se no regnava el perfido Satan.
Chi va su, chi va zo; chi sbalza o casca;
Megio è sempre scampar da la borasca.

XXXVI


Benedeto GESÙ, che ha reso alfin
De MARIA SERAFINA el cuor contento;
Ecola col so sposo almo divin
Compagnada per sempre in sto convento.
Zonto anca mi de le preghiere al fin,
El cuor per ela a giubilar me sento.
E se ho fenio la SETTIMANA SANTA,
Alleluja anca mi giusto è che canta.

XXXVII


Alleluja, Alleluja, che vol dir:
Alegrezza, alegrezza, o pecatori:
Cristo è risorto per mai più morir,
E la pena ha pagà dei nostri erori.
Ma adesso che ghe penso, ho da fenir,
Per no far aspetar i stampadori.
Alleluja, Alleluja, o vergin pia;
Alegrezza, alegrezza, e cussì sia.




Note a cura de l'autor
  1. Incurabili: Ospedale di Venezia
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=La_settimana_santa&oldid=50272"