L'omo grando e 'l picolo

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
L'omo grando e 'l picolo
XVIII secolo
Edission e fonte ▼
Altra edizion: L'Uomo grande ed il piccolo (1817)

[p. 296 modifica]

L'OMO GRANDO E 'L PICOLO.


Gh'era un paese al mondo
     (Che 'l nome no lo so
     Perchè no lo ricordo,
     Ma se mai ve premesse el savarò)
     5Del qual i so abitanti
     No solo gera manco de ziganti,
     Ma de una tal statura,
     Che per esempio a un ussaro
     No i ghe arivava gnanca a la centura.
     10Col trapassar dei ani
     Xe nato, che qualcun de sti paesani
     Metendose a viazar
     In sti nostri paesi à bu a arivar,
     Ma co i s'à visto in linea de statura
     15Far una miserissima figura,
     I à pensà de slongarla.
     Per quanto ch'i à possù
     La testa i à drezzà su,
     I à trato el peto in fora,
     20I à ritirà el martin,
     Marchiando sempre in ponta de scapin;
     E co'sto studio, dopo aver strussià,
     Tre quatr'once i s'à alzà,
     Senza però schivar
     25El rider de la zente
     E 'l rischio de cascar.
     Co a casa i xe tornai,
     Fra i costumi portai,
     I à messo in moda questo,
     30Che in verità à piasesto,
     Perchè co sto slongarse de statura
     Ghe pareva de far megio figura,
     Ognun sta nova moda à volsù tor,
     E l'à fato furor.
     35Intanto un viagiator
     De sti nostri paesi xe arivà
     Anca in quel logo là;
     Che quantunque nol fusse

[p. 297 modifica]

     D'una statura stramba e zigantesca,
     40El podeva a quei stropoli
     Magnarghe i macaroni su la testa.
     Al so primo arivar
     Tuti l'à buo a stimar;
     Ma quando ch'i l'à visto a caminar
     45Senza studio, a la bona,
     Co tuto el pie pusà,
     E senza donar gnente a la persona,
     I à dito: «Che pecà,
     Che un ometo, che xe piutosto grando
     50Vada co sto mal sesto caminando!»
     E uno fra quei tanti
     Se gh'à fato davanti,
     E à buo el coragio de parlar cussì:
     «Perchè no camineu, sior, come mi?
     55Per cossa no ve alzeo? —
     — Infelice Pigmeo,
     Ga risposto ridando el forestier,
     Chi è grando no à bisogno de parer.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=L%27omo_grando_e_%27l_picolo&oldid=68926"