El lamento

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.

[p. 273 modifica]


EL LAMENTO.


No, no xe vero, Filide,
     Che per cambiar teren
     Se cambi el mal in ben,
     4L'afano in gusto.
Co xe amalada l'anima
     Per tuto podè andar,
     Ma per tuto portar
     8Con vu la piaga.
Se fusse mai possibile
     Menar un condanà
     Ne la preson sarà
     12Da un polo a l'altro,
El ciel ridente o torbido
     Nol cambiaria de ton,
     Per lu saria preson
     16Parchi e zardini.
Tal so anca mi, d'un atomo,
     Con tuto el mio variar,
     No m'ò sentìo a scemar
     20Nel cuor l'afano.

La tropo cara imagine
     Sempre xe viva in mi;
     No vedo altro che ti,
     24Ti sola sento.
Ma, cara, oh Dio! do fulmini
     Quei bei ochi me par,
     E i vedo a condanar
     28La mia fredezza.
E pur no son colpevole:
     Se ti m'à leto el cuor,
     Ti avarà del dolor
     32Visto le marche.
Perchè quel zorno oribile
     Che t'ò cussì lassà,
     No xelo scancelà
     36Dai dì de l'ano?
Perchè un destin teribile,
     Perchè un dover tiran
     M'à de tegnir lontan
     40Da chi è 'l mio tuto?
Za le infernali furie
     Strazza ogni dì sto sen,

[p. 274 modifica]

     Sento tuto el velen
     44Dei so serpenti.
El sono (che dei miseri
     Sempre ga buo pietà)
     Da dopo che son qua
     48Mai no l'ò visto;
Nè ò visto che le tenebre,
     El silenzio, el dolor
     A ste note d'oror
     52Formar cortegio.
Gersera un leto morbido
     Non go possuo sofrir,
     Che m'à parso dormir
     56S'un leto d'aghi.
Son sbalzà su da rabia,
     Al ciel seren so andà,
     Ch'el gera iluminà
     60De stele ancora.
Oh come ò visto placida
     Natura a riposar!
     Oh quanto a tormentar
     64M'à bu l'invidia!
Za scomenzava a perderse
     Le stele, e 'l dì vicin
     El cantor matutin
     68Za saludava.
E solo l'alma Venere
     S'aveva in ciel fermà
     Per compassion, chi 'l sà?
     72De un qualche amante.
Za andava sbianchizandose
     Verso l'oriente el ciel,
     E i zefiri de miel
     76Spruzzava i fiori;
La bionda aurora, alzandose,
     Fava col so splendor
     Cambiar in t'un rossor
     80Quela biancura,
E da quel lume vivido
     Le montagne a indorar,
     E dopo a rossizar
     84Vedeva i coli:
E 'l ragio vivacissimo
     Del sol, che avea spontà,
     Rifleteva qua e là,
     88Sui prai, sui campi,
E sora l'erbe morbide,
     Che l'andava a ferir,

     Vedevi a comparir
     92Perle e diamanti.
Chi mai con sto spetacolo,
     Quando nol gera un mi,
     Benedio quel bel dì
     96No gavarave?
E pur l'oror, le tenebre
     Go bu a desiderar
     Per poder pascolar
     100La mia tristezza;
Che za no pol un'anima,
     Ch'à perso el caro ben,
     Goder più pase in sen,
     104Sentir più gusti.
Più gnente no la stuzzega,
     Gnente piacer ghe dà,
     Co quel ben no la ga
     108Che la riempiva.
Ben i se acorze, Filide,
     De la mia situazion,
     E son la derision
     112Dei mii nemici;
Ma deridème, stolidi,
     De mi ludibrio fè,
     Cussì no meritè
     116D'esser afliti:
Che st'aflizion, ste lagreme,
     Che me vedè a sgorgar,
     Queste me fa stimar,
     120E no avilirme.
El mio no xe incantesimo
     El vero ama sto cuor;
     Nè ga bisogno Amor
     124De far el mago.
Co 'l vogia d'una Filide
     Qualche cuor impiagar,
     Nol la ga che a mostrar;
     128Xe tropo ancora.
Cussì volesse el barbaro
     Mostrarme el caro ben
     Col bel ochio seren,
     132Co quel soriso:
Cussì, nel dì teribile
     Ch'ò da vegnirte a dir:
     O perdona, o morir
     136Vedime, cara:
Quela man adorabile
     Me avesse a solevar;

[p. 275 modifica]

     Sentisse a pronunziar:
     140Sì, te perdono.
Tuti i mumenti numero,
     Ch'à da portar quel dì,
     Ma tremo in fra de mi
     144Per quel mumento.
Sarastu quela Filide,
     Che co tanta pietà
     M'aveva perdonà
     148L'ardir de amarte?
O un altra? ah no, comovite,
     Pensa in che stato son,
     No zontar aflizion
     152A chi xe aflito!
No credaria provandolo:
     Ti sa coss'è dolor?
     Mi l'ò visto quel cuor,
     156So quanto el sente.
Sì, el mio lamento, Filide,
     Comoverà quel sen,
     E se cambierà in ben
     160Tuto l'afano;
Terminarà le lagreme,
     Le pene cessarà;
     Quel che no finirà
     164Sarà l'amarte.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_lamento&oldid=71457"