El fasan
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
A una cena formal,
Dove che se se trova ben e mal,
Aveva smagnazzà,
Sbevuchià,
5Chiacolà,
Quando che 'l rosto in tola s'à portà.
Sto rosto l'ò trovà gustoso e bon,
Ma 'l m'à parso capon,
Non badandoghe gnente,
10Come se fa a ste cene,
Che 'l gavesse da drio tacae le pene;
Ma quando che una dona,
Che gera de la cena la parona,
Per farme un scherzo, me l'à messe in man
15L'ò conossue per pene de fasan.
Alora in tel magnar
Quel rechioto de rosto che restava,
M'à parso de trovar
Quel gusto che in avanti no trovava.
20E mastegando pian
Go sentio propio el gusto del fasan;
E ò dito, soridendo in tel magnar,
«Ste pene me l'à fato fasanar,»
Fasani per caponi,
25Caponi per fasani
Anca i bipedi umani
Del mondo a le gran cene
Vien tolti per le pene.