El consegio
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Se amor mai da vu se vede,
Cari puti, a zogolar,
Per pietà no ghe dè fede,
No lo stessi a carezzar.
5Su la boca el mostra el riso,
La dolcezza sul so viso,
Ma col rider su la boca
Pizzegoni e slepe fioca;
E fra mezo a le carezze
10Mile stili, mile frezze
Quel furbazzo sa missiar:
Se savessi che zogheto
Che m'à fato un dì costù!
Dopo averme chiapà streto
15Da no moverme mai più,
Con un ago damaschin
Su la pele a pian pianin
Tuto quanto el me ponzeva;
Mi pianzeva, e lu rideva,
20E 'l diseva: «ti xe bravo,
Ma, birbon, t'ò fato schiavo.»
La gran rabia che go bu!
Saveu come che l'à fato
A chiaparme sto bricon?
25El s'à messo come un gato
Quachio quachio a cufolon;
L'à spetà che un dì Nineta
Me contasse una fiabeta;
Mi, credendo esser in porto,
30De colù no m'avea acorto;
E lù, vien per da drio via,
Chiapa, strenzi, e mena via,
Nè val pianti, nè rason.
A scravazzi de sta sorte
35Sto baron ghe ne sa far,
Come un bogia el dà la morte,
Quanto un bogia el sa strozzar;
Lu ga lazzi, el ga manere,
El ga forni, el ga caldiere,
40El ga corde e manganeli,
El ga chiodi, el ga marteli,
E lanzete e gamauti...
Ah! scampeghe, cari puti;
No se vince che a scampar.