Amar, amar, amar

by Antonio Negri

3 «Amar, amar, amar» In gondoleta. Barcarole e rime veneziane Monta, Nineta, in gondola Parcossa? Antonio Negri 1895 XIX Poesie

Indice:In gondoleta.pdf

Antonio Negri ―  In gondoleta. Barcarole e rime veneziane

«Amar, amar, amar»

1895

Edission original:	Antonio Negri, In gondoleta, Barcarole e rime veneziane, Milano, Carlo Aliprandi, 1895
Fonte:	Indice:In gondoleta.pdf

←  Monta, Nineta, in gondola

Edission e fonte ▼

Parcossa?  →

«AMAR, AMAR, AMAR...»

---

Nina, d'amor ne parla el çiel rosà,
                    Le rare nuvolete,
El sol basso su l'aqua, imporporà,
                    Le picole barchete
5Che su l'ondina placida, liziere,
                    Lontan le svola via
Tuto dise d'amor vose¹ sinçere,
                    Bela Nineta mia

Se una vela se perde nel lontan
                    10Paçifico orizonte;
Se co ela se perde un senso arcan
                    De contentezze sconte²,
De l'altre vele vien a nualtri in volta³
                    Più alegre sora 'l mar
15Tute 'ste cosse, mia Nineta, 'scolta,
                    No le te fa pensar?

Varda el cocal⁴ che sora l'aqua svola:
                    Come che 'l ride: senti!
No par che anca lu creda a la parola
                    20Dolçe e cara dei venti?
"Amar, amar", ne la so vose el canta:
                    "Amar, amar, amar"
Ti, mia Nineta, a la parola santa
                    No ti ghe vol badar?

25Le nuvole, el cocal, el sol, l'ondina,
                    Varda, crede a l'amor
Solo el ridar del çiel, dolçe mia Nina,
                    Te dise gnente el cuor?
Pensa da novo, cara, al sentimento
                    30Che me entusiasma mi:
Che le vele lontane o pur el vento
                    No diga gnente a ti?

---

1. vose = voci.
2. sconte = nascoste.
3. vien a nualtri in volta = vengono verso di noi, alla nostra volta.
4. cocal = gabbiano.